भक्तपुरको सुर्यविनायक नगरपालिका-५, कटुन्जेमा रहेको यूनिटी सेकेण्डरी स्कुलले आफ्नो २३ औँ स्थापना दिवसको अवसरमा एक दिने अभिभावक अभिमुखीकरण कार्यक्रम सम्पन्न गरेको छ।
शिक्षाकर्मी संजय खड्काको प्रमुख आतिथ्यतामा सम्पन्न कार्यक्रममा उनले विद्यालयले २३ वर्ष पूरा गर्दै गर्दा शैक्षिक गुणस्तर र भौतिक पूर्वाधारका क्षेत्रमा उल्लेखनीय उपलब्धि हासिल गरेको बताए। उनले विद्यालयको उत्कृष्ट व्यवस्थापन र नेतृत्वको भूमिकाका साथै अभिभावकको साथले नै २०८० सालको एसईई परीक्षामा ४ जिपिए हासिल गर्न सफल भएको उल्लेख गर्दै, यूनिटी स्कुल बालबालिकाको उज्ज्वल भविष्य निर्माण गर्ने थलो भएकाले अभिभावकहरू अन्यत्र जानु नपर्ने धारणा व्यक्त गरे।
कार्यक्रमका प्रमुख वक्ता उत्प्रेरक विकास देव योन्जनले अभिभावक, विद्यालय र विद्यार्थीबीचको सम्बन्धको महत्त्वबारे चर्चा गरे। उनले असल अभिभावकत्वका विभिन्न पक्षबारे प्रशिक्षण दिँदै बालबालिकालाई समय दिनुपर्ने, उनीहरूको व्यवहार र संगतमा ध्यान दिनुपर्ने कुरामा जोड दिए।
त्यसैगरी, सीटीएफ मन्टेस्वरी ट्रेनरले यूनिटी स्कुलमा मन्टेस्वरी तालिम प्रदान गरिँदै आएको जानकारी गराउँदै विद्यालयमा मन्टेस्वरी शिक्षण पद्दति लागू गरिएको बताए। कार्यक्रममा २०८० सालको एसईई परीक्षामा ४.० जिपिए ल्याएर बोर्ड टपर बनेका आशिष थापा क्षत्रीले आफ्नो सफलतामा विद्यालय र शिक्षकहरूको महत्वपूर्ण भूमिका रहेको बताए। उनले विद्यार्थीमैत्री वातावरणकै कारण आफूले उत्कृष्ट नतिजा ल्याउन सफल भएको उल्लेख गरे।
विद्यालयका प्रिन्सिपल विपिन गुमान्जुले विद्यालय २३ औँ वर्षमा प्रवेश गरेकोमा सम्पूर्ण अभिभावकहरूलाई धन्यवाद व्यक्त गरे। उनले २०८१ शैक्षिक सत्रदेखि विद्यालयले शैक्षिक गतिविधिसँगै विविध अतिरिक्त क्रियाकलाप तथा कार्यक्रम सञ्चालन गरेको हुँदा विद्यार्थीहरूको सिकाइ तथा व्यवहारिक ज्ञानमा उल्लेखनीय वृद्धि भएको बताए।
कार्यक्रममा विद्यालयका शिक्षक, अभिभावक तथा विद्यार्थीहरूको सक्रिय उपस्थिति रहेको थियो।
