काठमाडौं, साउन १६।
संगीत, शिक्षा र मानव सेवामार्फत बालबालिकाको उज्ज्वल भविष्य निर्माण गर्ने उद्देश्यले डिलाइट (DeLight Nepal) ले आफ्नो सातौँ परोपकारी सांगीतिक कार्यक्रम–२०२६ भव्य रूपमा सम्पन्न गरेको छ। नेपाल र ताइवानबीचको सांस्कृतिक आदानप्रदान, मित्रता तथा सामाजिक सहकार्यलाई थप सुदृढ बनाउने उद्देश्यका साथ आयोजित कार्यक्रममा विभिन्न सामाजिक संस्था, बालगृह, कलाकार, स्वयंसेवक, शुभेच्छुक तथा सर्वसाधारणको उल्लेखनीय सहभागिता रहेको थियो।

कार्यक्रमको शुभारम्भ नेपाल र ताइवानका राष्ट्रिय गानबाट गरिएको थियो। त्यसपछि डिलाइट तथा जुजुमामा (JuJuMaMa) का संस्थापकले स्वागत तथा उद्घाटन मन्तव्य राख्दै शिक्षा, संगीत र मानव सेवाको माध्यमबाट वञ्चित तथा अवसरबाट टाढा रहेका बालबालिकाको जीवनमा सकारात्मक परिवर्तन ल्याउन डिलाइटले सात वर्षदेखि निरन्तर कार्य गर्दै आएको जानकारी दिए। उनले कला मनोरञ्जनको माध्यम मात्र नभई सामाजिक रूपान्तरणको शक्तिशाली साधन भएको उल्लेख गरे।
उद्घाटन सत्रमा कार्यक्रमका विशिष्ट अतिथि तथा सहभागी संस्थाका प्रतिनिधिहरूको परिचय गराइएको थियो। साथै कार्यक्रम सफल बनाउन सहयोग गर्ने विभिन्न सहयोगी संस्था, प्रायोजक तथा स्वयंसेवकहरूप्रति आयोजकले विशेष आभार व्यक्त गरेको थियो।
कार्यक्रमको प्रमुख आकर्षणका रूपमा डिलाइट ब्यान्डको सांगीतिक भिडियो प्रदर्शन गरिएको थियो। त्यसपछि ब्यान्डले ‘गुराँसै फुल्यो’, ‘तालको पानी’ र ‘फुट्की जाने जोवन’ लगायतका लोकप्रिय नेपाली गीत प्रस्तुत गर्दा हलभरि दर्शकको उत्साहपूर्ण सहभागिता देखिएको थियो। सारङ्गी, मादल, गितार, बाँसुरी, स्याक्सोफोन तथा मधुर स्वरको उत्कृष्ट संयोजनले कार्यक्रमलाई थप जीवन्त बनाएको थियो।
यस अवसरमा डिलाइटसँग आबद्ध शिक्षकहरूलाई सम्मान तथा प्रमाणपत्र प्रदान गरिएको थियो। त्यस्तै डिलाइट ब्यान्डका सदस्यहरू, चिनियाँ गायन प्रतियोगिताका विजेताहरू तथा विभिन्न विधामा उत्कृष्ट योगदान दिने सहभागीहरूलाई पुरस्कार वितरण गरी सम्मान गरिएको थियो। कार्यक्रममा सहयोग पुर्‍याउने प्रायोजक तथा साझेदार संस्थाहरूलाई पनि प्रशंसापत्र प्रदान गरिएको थियो।ढ
सांस्कृतिक प्रस्तुतिमा त्रिनेत्र फाउन्डेसन, सीडीसीए (बालबालिका तथा अपाङ्गता भएका व्यक्तिहरूको केन्द्र), बोधिचित्त विकास समाज, ङारी कल्याण समाज, ह्याप्पी चिल्ड्रेन होम, सत्प्रयास फाउन्डेसन लगायत विभिन्न संस्थाका बालबालिका तथा कलाकारहरूले नेपाली तथा चिनियाँ गीत, नृत्य र वाद्यवादन प्रस्तुत गरी दर्शकको मन जितेका थिए। दुई देशका सांस्कृतिक प्रस्तुतिले कार्यक्रमलाई अन्तर्राष्ट्रिय स्वरूप दिएको सहभागीहरूको भनाइ थियो।
डिलाइट स्याक्सोफोन समूहका विद्यार्थीहरूले विश्वप्रसिद्ध गीत “Can’t Help Falling in Love” को सुमधुर धुन प्रस्तुत गर्दा दर्शकबाट लामो समयसम्म ताली गुञ्जिएको थियो। त्यसपछि डिलाइट शिक्षक समूहले प्रस्तुत गरेको विशेष सांगीतिक कार्यक्रमले वातावरणलाई थप भावपूर्ण बनाएको थियो।

कार्यक्रमको अन्त्यमा सम्पूर्ण कलाकार, सहभागी तथा दर्शकहरूले संयुक्त रूपमा ‘रेशम फिरिरी’ गाएर नेपाल–ताइवान मित्रताको भावलाई अझ सशक्त रूपमा अभिव्यक्त गरेका थिए। समापन मन्तव्यमा आयोजकले उपस्थित सम्पूर्ण अतिथि, कलाकार, स्वयंसेवक, सहयोगी संस्था, प्रायोजक तथा दर्शकहरूप्रति हार्दिक धन्यवाद व्यक्त गर्दै आगामी वर्ष अझ भव्य र प्रभावकारी कार्यक्रमका साथ पुनः भेट्ने प्रतिबद्धता जनाएका थिए । अन्त्यमा सबै सहभागीले सामूहिक तस्बिर खिच्दै कार्यक्रम सम्पन्न भएको थियो।

डिलाइटले विगत सात वर्षदेखि नेपालका विभिन्न बालगृह, विद्यालय तथा समुदायका बालबालिकालाई निःशुल्क संगीत शिक्षा, सारङ्गी, गितार, स्याक्सोफोन, पियानो लगायतका वाद्यवादन प्रशिक्षण, शैक्षिक सामग्री सहयोग तथा व्यक्तित्व विकासका कार्यक्रम सञ्चालन गर्दै आएको छ। ताइवानस्थित JuJuMaMa को सहकार्यमा सञ्चालित यस अभियानले नेपालका सयौँ बालबालिकालाई संगीतमार्फत आत्मविश्वास, सिर्जनशीलता र नयाँ अवसर प्रदान गर्दै आएको आयोजकको भनाइ छ।
यस वर्षको सातौँ परोपकारी सांगीतिक कार्यक्रमले कला, शिक्षा र सेवाको माध्यमबाट मानवता, मित्रता, सहकार्य र आशाको सन्देश प्रवाह गर्दै नेपाल–ताइवानबीचको सांस्कृतिक सम्बन्धलाई अझ प्रगाढ बनाएको सहभागीहरूले बताएका छन्।