काठमाडौँ । नेशनल लाईफ इन्स्योरेन्सले कूल बीमाशुल्क १६,६६ प्रतिशतले वृद्धि भएको जानकारी गराएको छ । कम्पनीको शुक्रबार सम्पन्न ३६ औं वार्षिक साधारणसभामा अध्यक्ष प्रेमा सिंहले उक्त जानकारी गराएकी हुन् । सिंहका अनुसार आव २०७९–०८० मा कम्पनीको सबै वित्तीय सूचाङ्कहरु उत्साहप्रद रहेका छन् । जसअनुसार कम्पनीको कूल बीमाशुल्क १६,६६ प्रतिशतले बृद्धि हुँदा रु १,६८०।९० करोड पुगेको उनले जानकारी दिएकी छन्।
समिक्षा वर्षको संचालनवाट जम्मा रु ९३१.८३ करोड खूद थप रकम कूल बीमा करार दायित्वमा सारिएको छ भने कूल बीमा करार दायित्व गत वर्षको तुलनामा १७.७६ प्रतिशतले बृद्धि भई वर्षान्तमा रु ६,५४०.४० करोड पुगेको छ । यस्तै कूल लगानी १५.७२ प्रतिशतले बृद्धि भई रु. ४,९७८.२० करोड पुगेको कम्पनीले जनाएको छ । कम्पनीले ब्यवसायीक लक्ष्य र संस्थागत सामाजिक उत्तरदायित्व बीचको सन्तुलनलाई निरन्तरता दिई नियमनकारी निकायको निर्देशन अनुसार खूद नाफाको १ प्रतिशतले रु ९७,३३,१५० बराबर रकम सामाजिक उत्तरदायित्व जगेडामा स्थानान्तर गर्न सफल भएको पनि जनाएको छ ।
३६ औं वार्षिक साधारणसभाले आव २०७९–०८० को लागि अद्यावधिक चुक्ता पूँजी रु ५,०१,१६,६६,४२५ मा १० प्रतिशतका दरले नगद लाभांश रु. ५०,११,६६,६४२।५० र ४ प्रतिशतका दरले वोनस शेयर लाभांश रु २०,०४,६६,६५७ साथै उक्त नगद एवं वोनस लाभांशमा कर प्रयोजनको लागि रु ३,६९,२८,०६८.३९ नगद लाभांश प्रदान गर्ने प्रस्ताव पारित गरेको छ । नियामक निकायले जीवन बीमा कम्पनीको चुक्ता पूँजी रु ५ अरब पुर्याउनुपर्ने वाध्यात्मक ब्यवस्था गरेकोमा हालको कायम रहेको चुक्ता पूँजी रु ५,०१,१६,६६,४२५ मा ४ प्रतिशतको वोनस शेयर थप भई कूल चुक्ता पूँजी रु ५,२१,२१,३३,०८२ पुगेको कम्पनीले जनाएको छ ।
