काठमाडौँ । नेपाल कम्युनिस्ट पार्टीका प्रबक्ता प्रकाण्ड सीले नेकपाप्रति युवाहरुको आकर्षण बढ्दै गएको बताएका छन् । सो पार्टीनिकट युवा संगठन नेपालद्वारा सोमबार आयोजित पार्टी प्रवेश कार्यक्रमलाई सम्बोधन गर्दै उनले सो कुरा बताएका हुन्।
उक्त कार्यक्रमलाई सम्बोधन गर्दै प्रबक्ता प्रकाण्ड सीले देशले आफ्ना प्रतिनिधिहरुमार्फत बिशेष भूमिका माग गरिरहेको समयमा युवाहरु नेकपामा लामबद्ध हुनुको बिकल्प नभएको बताए । उनले वर्तमान संकटग्रस्त अवस्थामा देश र जनताले आफ्ना सेवकबाट निर्णायक भूमिका माग गरिरहेको अवस्थामा युवाहरु नेकपमा आबद्ध हुनु आफैमा सुझबुझपूर्ण , क्रान्तिकारी र महत्वपूर्ण कार्य भएको बताए ।
यसैगरी, प्रवक्ता प्रकाण्ड सीले नेकपामा प्रवेश गरेका युवाहरुलाई स्वागत गर्दै इमान्दारिता र जोडतोडका साथ कार्य गरे नेकपामा युवाहरुको लहर लाग्ने बताए । उनले देश र जनतालाई वर्तमान संकटबाट मुक्त पार्न नेपाली जनताको एकताबद्ध पहल र नेपाल कम्युनिस्ट पार्टीको नेतृत्व जरुरी रहेकोसमेत बताए ।
उक्त कार्यक्रममा प्रवक्ता प्रकाण्ड सीले नेकपा एकीकृत समाजवादी खाडाचक्र नगरपालिका उपाध्यक्ष तथा खाडाचक्र नगरपालिका कार्यपालिका सदस्य रमेश विक , नेकपा माओवादी केन्द्र खाडाचक्र नगरपालिका ४ नम्वर वार्ड अध्यक्ष कविराज विक , नेकपा माओवादी केन्द्र ४ नम्वर वार्ड कमिटी सदस्य कर्ण विक , नेकपा माओवादी केन्द्र खाडाचक्र नगरपालिका ४ वार्ड कमिटी सदस्य बिरभद्र विक र रति विक र नेपाली कांग्रेस खाडाचक्र नगरपालिका वार्ड सदस्य सुरेश वि कलागायतलाई अबिर र खादा लगाई नेपाल कम्युनिस्ट पार्टीमा पवेश गराएका थिए।
नेपाल कम्युनिस्ट पार्टीका नेता तथा कार्यकर्ताको बाक्लो उपस्थितिमा भएको उक्त कार्यक्रमको संचालन युवा संगठन नेपालका केन्द्रिय अध्यक्ष दिनेश सीले गरेका थिए ।
