काठमाडौं/ विश्व महिला सम्मेलनअन्तर्गतको सैद्धान्तिक सेमिनार काठमाडौंमा हुने भएको छ । आज रिपोर्टर्स क्लब नेपालमा पत्रकार सम्मेलन गरी मंसिर ११ देखि १३ गतेसम्म काठमाडौंको कपनमा कार्यक्रम गर्न लागिएको जानकारी गराइएको हो ।
महिला मुक्तिको कठोर शत्रु नाफाको अतृप्त लोभ, दोहोरो शोषण, जातिवाद, लैङ्गिक विभेद, उत्तरआधुनिकतावाद, अवसरवाद र कम्युनिस्ट विरोधी भावना रहेको उल्लेख छ । यसका लागि महिला आन्दोलनका सैद्धान्तिक आधारहरूको व्यापक छलफल र विकास अपरिहार्य रहेको बताइएको छ ।
‘अब साम्राज्यवादविरुद्ध र महिलाको वास्तविक मुक्तिको सङ्घर्षमा आफ्नो भूमिका गहिरोसँग बुझ्ने र निर्वाह गर्ने समय आएको छ । यो सैद्धान्तिक सेमिनारले त्यसका लागि हामीलाई आवश्यक आधारहरू प्रदान गर्नेछ । त्यसका साथै यसले महिलालाई शोषण र उत्पीडनबाट मुक्त गर्ने हाम्रो सङ्घर्षका सैद्धान्तिक आधार र भविष्यका दृष्टिकोणहरूबारे छलफल गर्न अझ महत्त्वपूर्ण सहयोग गर्नेछ,’– विज्ञप्तिमा भनिएको छ ।
विश्वका चार महादेशका २०भन्दा बढी देशका महिलाहरू काठमाडौंमा आयोजित विश्व महिला सम्मेलनको सैद्धान्तिक सेमिनारमा सहभागी हुने बताइएको छ ।
सन् २००८ मा जर्मनीबाट प्रारम्भ भएको साम्राज्यवाद बिरोधी विश्व महिला सम्मेलनको पहिलो कार्यक्रम सन् २०११मा भेनेजुयलामा ३५ सय प्रतिनिधिहरुको सहभागितामा सम्पन्न भएको थियो।
त्यस्तै दोस्रो बिश्व महिला सम्मेलन सन् २०१६ मा काठमाडौ र तेस्रो बिश्व महिला सम्मेलन सन् २०२२ मा ट्युनिसियामा भएको बताइएको छ भने सन् २०२७ मा चौथो बिश्व महिला सम्मेलन गर्ने कार्यक्रम रहेको छ।
शान्ति, न्याय, मानवता र महिला अधिकारको प्रमुख चुनौती साम्राज्यवाद भएकोले त्यस विरुद्धको महिला सशक्तीकरणको उदेश्य सहित निर्माण गरिएको उक्त सम्मेलनमा नेपालको तर्फबाट अखिल नेपाल महिला संघ (क्रान्तिकारी),अनेमसंघ क्रान्तिकारी, अखिल नेपाल महिला संघ, अनेम संघ क्रान्तिकारी र समाजवादी महिला संगठन गरी पाँच संघ/ संगठनहरुको सहभागिता रहेको छ ।
