काठमाडौं : नेकपा (एमाले) अध्यक्ष केपी शर्मा ओली र नेतृ विद्या देवी भण्डारीबीच आज ललितपुरस्थित पार्टी कार्यालयमा महत्वपूर्ण भेटवार्ता सम्पन्न भएको छ।
हालै पार्टीभित्र सदस्यता नवीकरणको विषयलाई लिएर चर्काचर्की भइरहेका बेला दुई शीर्ष नेताबीचको यो भेटलाई विशेष अर्थमा हेरिएको छ। भेटमा पार्टीको संगठनात्मक अवस्था, आन्तरिक विवाद समाधानका उपाय र भावी रणनीतिका विषयमा विस्तृत छलफल भएको बताइएको छ।
भेटवार्तामा वरिष्ठ उपाध्यक्ष ईश्वर पोखरेल, उपाध्यक्ष सुरेन्द्र पाण्डे, महासचिव शंकर पोखरेल, पोलिटब्युरो सदस्य कर्ण थापा लगायत शीर्ष नेताहरूको उपस्थिति रहेको थियो।
स्रोतका अनुसार, विद्या भण्डारीले हालको सदस्यता नवीकरण प्रक्रियाप्रति केही असन्तुष्टि जनाउँदै पार्टी एकता र अनुशासन कायम राख्न सुझाव दिएकी थिइन्। अर्कोतर्फ, अध्यक्ष ओलीले पार्टी अनुशासन र विधिप्रति सबै नेता कार्यकर्ताले सम्मान जनाउनु आवश्यक रहेको धारणा राखेका थिए।
भेटपछि बाहिर सार्वजनिक वक्तव्य दिइएको छैन तर आन्तरिक समन्वय र सन्तुलन कायम गर्न संवादलाई निरन्तरता दिने सहमति भएको बुझिएको छ।
पार्टीभित्र चुलिंदो असन्तोषका बीच भएको यो भेटवार्ताले एमालेको आन्तरिक राजनीतिको दिशा परिवर्तन गर्ने सक्ने अनुमान गरिएको छ।
