भक्तपुर, मध्यपुर थिमी – वर्षायामको जोखिम बढ्दै गएको सन्दर्भमा मध्यपुर थिमी नगरपालिकाका मेयर सुरेन्द्र श्रेष्ठ आफैं डोजर लिएर हनुमन्ते खोलामा प्रवेश गरेका छन्। खोलामा जमेको माटो र फोहोर पन्छाउँदै, सम्भावित बाढीजन्य विपद् रोकथामका लागि उनले आफैं नेतृत्वदायी भूमिका निर्वाह गरेका हुन्।
हाम्रो संवाददाताका अनुसार, पछिल्ला दिनहरूमा प्रि-मनसुनकै अवधिमा अत्यधिक वर्षा भएपछि हनुमन्ते खोलाको बहाव अवरुद्ध हुन थालेको थियो। प्रत्येक वर्ष जस्तै यसपटक पनि खोलाले वरपरका बस्तीहरूमा डुबान र क्षति पुर्याउने सम्भावना उच्च देखिएको अवस्थामा नगर प्रमुख श्रेष्ठ आफैं डोजर लिएर खोलाको फोहोर हटाउन पुगेका हुन्।
“जनताको सुरक्षा नै हाम्रो पहिलो दायित्व हो। खोला सफा नगरेमा बाढीको खतरा अत्यन्त बढ्छ। त्यसैले हामी ढिलो नगरी मैदानमै उत्रियौं,” मेयर श्रेष्ठले भने। मौसम विज्ञान विभागले यस वर्ष मनसुन अघिल्ला वर्षहरूभन्दा सक्रिय हुने सम्भावना औंल्याउँदै जोखिमपूर्ण क्षेत्रमा सतर्क रहन आग्रह गरिसकेको छ। त्यसअनुरूप नगरपालिका प्रशासनले पनि तयारी तीव्र पारेको छ। हनुमन्ते खोला वरपरका वस्तीहरू, विशेषतः थिमी, कमलबिनायक, औरुबहाल, बालकुमारी आदि क्षेत्र हरेक वर्ष बाढीको उच्च जोखिममा पर्नेजस्ता रहेका छन्।
नगरपालिकाले हाल खोला सफाइ, नालीनाली खोल्ने, जमेको मलमोत्र हटाउने, र आवश्यक पर्दा नदीछेउका संरचनाहरूलाई सचेत गराउने कार्यलाई प्राथमिकतामा राखेको छ। यस क्रममा स्वयं मेयरको सहभागिताले स्थानीय प्रशासनको संकल्प र जनप्रतिनिधिको उत्तरदायित्वबोधको स्पष्ट सन्देश दिएको छ।
स्थानीयवासी शारदा थापा भन्छिन्, “हामी पहिले मेयरहरूलाई कागजमा मात्रै देख्थ्यौं। अहिले सुरेन्द्र मेयरज्यू आफैं खोलामा पस्नुभएको देखेर हामीलाई विश्वास लागेको छ—हामी जोखिममा एक्ला छैनौं।” यस कार्यले नगरवासीहरूबीच सकारात्मक सन्देश दिएको छ भने, अन्य स्थानीय तहका प्रतिनिधिहरूका लागि पनि प्रेरणा बन्ने अपेक्षा गरिएको छ।
