काठमाडौं, वैशाख ३० – वैदेशिक रोजगार व्यवसायीहरूको छाता संस्था नेपाल वैदेशिक रोजगार व्यवसायी संघ (NAFEA) को नयाँ नेतृत्व चयन भएको छ। शनिबार सम्पन्न निर्वाचनबाट भुवनसिंह गुरूङ संघको अध्यक्ष पदमा निर्वाचित भएका छन्।

गुरूङले निकटतम् प्रतिस्पर्धी नरेश गेलाललाई ६१ मतको अन्तरले पछि पार्दै विजयी भएका हुन्। उनले कुल ४२८ मत प्राप्त गरेका थिए भने गेलालले ३६७ मत ल्याएका थिए। संघको अन्य पदाधिकारीहरूमा पनि नयाँ अनुहारहरू चयन भएका छन्। प्रथम उपाध्यक्षमा सुजित कुमार श्रेष्ठ, द्वितीय उपाध्यक्षमा देवकुमार खोखाली, र तृतीय उपाध्यक्षमा बैकुण्ठप्रसाद पौडेल निर्वाचित भएका छन्।

महासचिव पदमा महेशकुमार बस्नेतले जित हात पार्दै ४२३ मत ल्याएका छन्। उनका प्रतिस्पर्धी कर्णराज कटुवालले ३६२ मत प्राप्त गरेका थिए। अन्य पदमा निर्वाचित हुनेहरूमा सचिव कुन्छा दोर्जे डिमडुङ र कोषाध्यक्ष धनमाया सिञ्जाली रहेका छन्।

सदस्य पदमा विजयी हुनेहरूमा रेखा शर्मा, कृष्ण ढकाल, भरत सापकोटा, रामकाजी भोलान, सुवर्ण लामा, हीमा गुरूङ, रमा खड्का, देवीप्रसाद गिरी, सुमनराज पाण्डे र विद्यालक्ष्मी बज्राचार्य छन्।

नव-निर्वाचित अध्यक्ष गुरूङले वैदेशिक रोजगार क्षेत्रलाई व्यवस्थित, सुरक्षित र पारदर्शी बनाउन सबै व्यवसायीहरूको सहयोग लिएर अघि बढ्ने प्रतिबद्धता जनाएका छन्।