भक्तपुर, २० चैत्र — भक्तपुर नगरपालिकाको दरबार क्षेत्रस्थित बालमन्दिर आधारभूत विद्यालयमा अध्ययनरत २३ जना अनाथ बालबालिकालाई शैक्षिक सामग्रीसहित विभिन्न आवश्यक सामान प्रदान गरिएको छ।
काठमाडौं काँडाघारीमा अध्ययनरत लक्ष्यजीत मल्ल (कक्षा ७) र समृद्धि मल्ल (कक्षा ५) ले स्वर्गीय हजुरआमा लोचनाकुमारी मल्ल (विद्यालयकी पूर्व प्रिन्सिपल) को स्मृतिमा विद्यालयका अनाथ विद्यार्थीहरूलाई सहयोग गरेका हुन्।
उनीहरूले झोला, कापी, कलम, पेन्सिल, कटर, पोशाक, जुत्ता, मोजालगायत आवश्यक सामग्री तथा नगद सहयोग गरेका छन्। विद्यालयकी प्रधानाध्यापिका न्हुछेंलक्ष्मी गोरा का अनुसार, नर्सरीदेखि कक्षा १ सम्म अध्ययनरत यी २३ जना बालबालिका आमाबुबाविहीन अनाथ हुन्, जो विद्यालयमै बसोबास गर्छन्।
सहयोग हस्तान्तरण कार्यक्रममा विद्यालय व्यवस्थापन समितिका अध्यक्ष तथा भक्तपुर नगरपालिका वडा नं. ३ का अध्यक्ष राजकृष्ण गोरा प्रमुख अतिथिका रूपमा उपस्थित थिए। उनले लक्ष्यजीत र समृद्धिको योगदानलाई प्रेरणादायी बताउँदै समाजमा सहयोगको संस्कार विकास गर्न यस्तो पहल महत्वपूर्ण हुने धारणा व्यक्त गरे।
सानै उमेरदेखि सामाजिक उत्तरदायित्व बोध गरेका यी दाजु-बहिनीले यसअघि पनि विभिन्न विद्यालयहरूमा सहयोग गरिसकेका छन्। समृद्धिले सहयोग गर्न पाउँदा खुशी लागेको बताउँदै दानको महत्व बुझ्न सके अझ धेरै व्यक्तिहरूले समाजमा सकारात्मक परिवर्तन ल्याउन सक्ने विश्वास उनको थियो ।
