ललितपुर। नेपाली खानाको मौलिकता जोगाउँदै अन्तर्राष्ट्रिय स्तरमा प्रवर्द्धन गर्ने उद्देश्यले नेपाली सेफ सोसाइटीले २०८२ साल वैशाख ४ गते “इन्टर कलेज फुड कम्पिटिसन २०२५” आयोजना गर्ने भएको छ। शनिबार ललितपुरको एक होटलमा आयोजित पत्रकार सम्मेलनमा संस्थाले यसबारे जानकारी गराएको हो।
संस्थाका अध्यक्ष एल. बी. कौशलका अनुसार प्रतियोगिताले नेपाली सेफहरूलाई एकजुट गर्दै नेपालको पाककला, पर्यटन र खानालाई विश्वसामु चिनाउने लक्ष्य राखेको छ। प्रतियोगितामा विजेताले १ लाख रुपैयाँ नगद पुरस्कार प्राप्त गर्नेछन्।
यसै अवसरमा काठमाण्डौको प्रदर्शनी मार्गस्थित भृकुटीमण्डपमा नेपाली सेफ सोसाइटी र इन्टरनेशनल नेपाली सेफ सोसाइटीको प्रथम केन्द्रीय अधिवेशन पनि आयोजना हुनेछ। साथै, इन्टरनेशनल नेपाली सेफ फुड अवार्ड, सोसिएल अवार्ड, नेपाली खानाको प्रदर्शन तथा फुड फेस्टिबल आयोजना गरिनेछ।
कार्यक्रममा ३६ देशमा कार्यरत नेपाली सेफहरूको सहभागिता रहनेछ। वैशाख ६ गते भृकुटीमण्डपमा हुने फुड फेस्टिबलमा करिब ४० वटा स्टलहरू रहनेछन्, जसमा परम्परागत नेपाली रैथाने खानाका परिकारदेखि आधुनिक परिकारसम्म प्रदर्शन गरिनेछ। साथै, झाँकी, सांस्कृतिक कार्यक्रम र मनोरञ्जनात्मक प्रस्तुतीहरू पनि रहनेछन्।
नेपाली खानाको प्रवर्द्धन र सेफहरूको व्यक्तित्व विकासमा योगदान दिने उद्देश्यले आयोजना गरिने यस ऐतिहासिक प्रतियोगिता र महोत्सवले नेपालको पाककला क्षेत्रलाई थप मजबुत बनाउने आयोजकहरूले बताएका छन्।
