ललितपुर, चैत – काठमाडौंको तीनकुनेमा चैत १५ गते भएको हिंसात्मक प्रदर्शनका क्रममा अराजक समूहले सञ्चारमाध्यम तथा सञ्चारकर्मीहरूलाई निशाना बनाएको घटनमा पत्रकार सुरेश रजकको हत्या हुनुका साथै विभिन्न सञ्चारगृहमा तोडफोड गरिएको प्रति आपति जनाएको छ ।
उक्त घटनाप्रति नेपाल पत्रकार महासंघ ललितपुर जिल्ला शाखाले गम्भीर ध्यानाकर्षण भएको जनाउँदै ललितपुरका प्रमुख जिल्ला अधिकारीमार्फत नेपाल सरकारलाई तुरुन्त कारबाहीको माग गर्दै ज्ञापन पत्र बुझाएको छ। महासंघले जारी गरेको विज्ञप्ति तथा ज्ञापनपत्रमा प्रेस स्वतन्त्रता माथिको आक्रमणलाई अस्वीकार्य बताउँदै दोषीमाथि कडा कारबाही गर्न माग समेत गरिएको छ।
नेपाल पत्रकार महासंघ ललितपुर शाखा अध्यक्ष रामहरि कार्कीद्वारा जारी विज्ञप्तिमा सरकारले पत्रकारहरूको सुरक्षा सुनिश्चित गर्न आवश्यक कदम चाल्नुपर्ने उल्लेख गरेको छ। उनले घटनाको सत्यतथ्य छानबिन गरी दोषीलाई कानुनी दायरामा ल्याउन जोड दिएका छन्।
महासंघले यस्ता घटनाहरू दोहोरिन नदिन नेपाल सरकारले प्रभावकारी कदम चाल्नुपर्ने बताउँदै पत्रकारहरूको सुरक्षालाई सुनिश्चित गर्न विशेष ध्यान दिन आग्रह गरेको छ। साथै, प्रेस स्वतन्त्रताको रक्षा गर्दै सञ्चारकर्मीहरूको हकहित संरक्षणका लागि सम्बद्ध निकायहरू गम्भीर हुनुपर्ने महासंघको भनाइ छ।
