भक्तपुर : मध्यपुर थिमि नगरपालिकाले उत्कृष्ट नगरपालिका पुरस्कार प्राप्त गरेको छ। बिहीबार नेपाल नगरपालिका संघको ३२औं वार्षिक उत्सवको अवसरमा सांस्कृतिक, वातावरण, र पर्यटकीय क्षेत्रमा उल्लेखनीय कार्यसम्पादन गरेको आधारमा उक्त पुरस्कार प्रदान गरिएको हो।
प्रधानमन्त्री केपी शर्मा ओलीले नगरपालिकालाई पुरस्कृत गरेका थिए। नगरपालिकाका प्रमुख सुरेन्द्र श्रेष्ठ र प्रमुख प्रशासकीय अधिकृत राम बहादुर केसीलाई सम्मानस्वरूप कदरपत्र हस्तान्तरण गरिएको थियो।
नगरपालिकाले आर्थिक वर्ष २०८०/८१ मा वातावरण, संस्कृति, र पर्यटन प्रवर्द्धनका क्षेत्रमा उल्लेखनीय कार्यहरू गरेको उल्लेख छ।
पुरस्कार प्राप्त गरेपछि नगर प्रमुख श्रेष्ठले स्थानीय बासिन्दाको साथ र सहयोगबाट नगरका मूर्त–अमूर्त सम्पदाहरूको प्रवर्द्धन गर्ने प्रयासलाई उच्च मूल्याङ्कन गरिएको बताए। यसले नगरपालिकालाई अझ प्रभावकारी कार्य गर्न हौसला प्रदान गर्ने उनको भनाइ छ।
नगरपालिकाले आगामी दिनहरूमा पनि सम्पदा र संस्कृतिको संरक्षण तथा प्रवर्द्धनमा विशेष ध्यान दिने रणनीति अपनाएको छ। पर्यटन प्रवर्द्धनका लागि यही चैत २७ गते मध्यपुर थिमीको नगदेशमा धिमेबाजा प्रतियोगिता आयोजना गरिने जनाइएको छ।
