काठमाडौं – जनपक्षीय एवम् मार्क्सवादी स्रष्टा एमबी सर्वहारा सम्मानित भएका छन्। नेपाल कम्युनिस्ट पार्टी (माओवादी केन्द्र) समर्थित जनसाँस्कृतिक महासंघ द्वारा मंगलबार काठमाडौंको प्रज्ञा डबलीमा आयोजित कार्यक्रममा उनलाई सम्मान गरिएको हो।
२०५५ साल चैत ५ गते काभ्रेको अनेकोटमा च्याङ्वा लामा सहित ७ जना जनकलाकारलाई तत्कालीन राज्य पक्षले सामूहिक हत्या गरेको थियो। त्यस घटनाको स्मृतिमा प्रत्येक वर्ष सांस्कृतिक प्रतिरोध दिवस मनाइँदै आएको छ। सोही अवसरमा महासंघले सांस्कृतिक आन्दोलनमा विशेष योगदान पुर्याएका विभिन्न ७ विधाका कलाकारहरूलाई सम्मान गर्ने परम्परा कायम राखेको छ।
यस वर्षको गीत, संगीत र नाट्य विधा तर्फको सम्मान एमबी सर्वहारालाई प्रदान गरिएको हो। नेकपा माओवादी केन्द्रका अध्यक्ष तथा पूर्वप्रधानमन्त्री पुष्पकमल दाहाल ‘प्रचण्ड’को उपस्थितिमा उनलाई नगदसहित प्रमाणपत्र प्रदान गरिएको थियो।
एमबी सर्वहाराको सांस्कृतिक यात्रा
२०२९ सालमा अछामको मङ्गलसेन नगरपालिका–१२, पालाकाटियामा जन्मिएका सर्वहाराले २०४५/०४६ सालदेखि प्रगतिशील गीत-संगीतको यात्रा सुरु गरेका थिए। हाल उनी कैलालीको लम्की चुहा नगरपालिका–५, थापापुरमा बसोबास गर्छन्।
२०५२ सालमा जनयुद्ध सुरु भएसँगै उनी भारत प्रवासका विभिन्न क्षेत्रमा रहेर सांस्कृतिक टिमको नेतृत्व गरे। त्यस क्रममा उनी तत्कालीन जनसाँस्कृतिक महासंघको उपाध्यक्ष समेत बने। जनयुद्धको समयमा सामना साँस्कृतिक टोलीसहित देशभर सांस्कृतिक आन्दोलनमा क्रियाशील रहेका उनी वरिष्ठ जनपक्षीय स्रष्टा हुन्।
