काठमाडौं, ७ चैत — माध्यमिक शिक्षा परीक्षा (एसईई) आजदेखि सुरु भएको छ। बिहान ८ बजेदेखि देशभर परीक्षा सञ्चालन भइरहेको छ।
पहिलो दिन अनिवार्य अंग्रेजी तथा संस्कृत वेदविद्याङमतर्फ अनिवार्य संस्कृत रचना र मदरसातर्फ अनिवार्य अरेबिक भाषा विषयको परीक्षा सञ्चालन भइरहेको छ।
राष्ट्रिय परीक्षा बोर्ड, परीक्षा नियन्त्रण कार्यालय (कक्षा-१०) का अनुसार यस वर्ष ५ लाख १४ हजार ७१ जना विद्यार्थी परीक्षामा सहभागी भएका छन्। गत वर्षको तुलनामा यस वर्ष परीक्षार्थीको सङ्ख्या ४९ हजार २८६ ले बढेको छ।
यस वर्ष परीक्षा सञ्चालनका लागि २,०७९ परीक्षा केन्द्र तोकिएको छ। परीक्षामा १५० जनासम्म परीक्षार्थी हुने केन्द्रमा एकजना सहायक केन्द्राध्यक्ष र प्रत्येक २० जना विद्यार्थीका लागि एकजना निरीक्षक रहने व्यवस्था गरिएको छ। परीक्षार्थी संख्या ७५ भन्दा कम भएका केन्द्रहरूमा भने सहायक केन्द्राध्यक्ष नराखिने परीक्षा नियन्त्रण कार्यालयले जनाएको छ।
एसईई परीक्षा यही चैत १९ गतेसम्म बिहान ८ देखि ११ बजेसम्म सञ्चालन हुनेछ। यसपटक पनि जापानबाट ३७ जना विद्यार्थी परीक्षामा सहभागी भएका छन्।
