काठमाडौं, चैत ४ – नागरिक लगानी कोषले चालू आर्थिक वर्षको पुस मसान्तसम्म विभिन्न आयोजना तथा क्षेत्रहरूमा कुल २ खर्ब ६४ अर्ब ७८ करोड लगानी गरेको छ। कोषको ३५औँ वार्षिकोत्सवका अवसरमा सोमबार काठमाडौंमा आयोजित कार्यक्रममा कोषका अध्यक्ष प्रा. डा. सूर्यबहादुर थापाले यो जानकारी गराएका हुन्।
उनले कोषले हालसम्म २ खर्ब ७३ अर्ब ७२ करोड वित्तीय स्रोत संकलन गर्न सफल भएको पनि बताए। उनले मुलुकको आर्थिक वृद्धिदरमा टेवा पुर्याउने, रोजगारी सिर्जना गर्ने तथा कृषि, पूर्वाधार, उत्पादनमूलक क्षेत्र, उद्योग र पर्यटन जस्ता क्षेत्रमा लगानी बढाउन आवश्यक रहेको उल्लेख गरे।
सेवाग्राहीको पहुँचमा कोष
कोषका कार्यकारी निर्देशक रमण नेपालका अनुसार, सेवाग्राहीको पहुँचमा कोषलाई अझ प्रभावकारी बनाउन काठमाडौं उपत्यका बाहिर विराटनगर, पोखरा, बुटवल, अत्तरिया र सुर्खेतमा शाखा कार्यालय सञ्चालन गरिसकिएको छ। उनले नयाँ सूचना प्रविधि प्रणालीमा सुधार गर्दै नयाँ सफ्टवेयर सञ्चालनमा ल्याइएको जानकारी पनि दिए।
कोषले दीर्घकालीन दायित्व व्यवस्थापनका लागि विभिन्न संघसंस्थाहरूसँग सहकार्य गर्दै लगानी विस्तार गर्ने योजना बनाएको छ। आर्थिक वृद्धिदर प्रवर्द्धन गर्ने उद्देश्यले कोषले रणनीतिक योजना अघि बढाएको छ।
