काठमाडौँ – काठमाण्डौं स्कुल अफ ल (केएसएल) का कार्यकारी निर्देशक डा. युवराज संग्रौलामाथि यौन दुर्व्यवहारको आरोप लागेको छ। आरोपको निष्पक्ष छानबिन गर्न केएसएल व्यवस्थापन समितिले स्वतन्त्र जाँचबुझ समिति गठन गरेको छ।
आयोजित पत्रकार सम्मेलनमा केएसएलले पूर्व जिल्ला न्यायाधीश डा. श्रीकृष्ण भट्टराईको संयोजकत्वमा तीन सदस्यीय समिति गठन गरिएको जानकारी दिएको हो। समितिमा वरिष्ठ पत्रकार तीर्थ कोइराला र अधिवक्ता सिमा धामी सदस्य रहेका छन्। समितिलाई १५ दिनभित्र प्रतिवेदन पेश गर्न निर्देशन दिइएको छ।
के हो आरोप?
केएसएलको पाँचौं वर्षमा अध्ययनरत एक छात्राले सामाजिक सञ्जाल इन्स्टाग्राममार्फत डा. संग्रौलासहित केही प्राध्यापकहरूले छात्राहरूमाथि यौनजन्य टिप्पणी गर्ने, महिलाको शरीरबारे अपमानजनक शब्द प्रयोग गर्ने गरेको खुलासा गरेकी थिइन्। उनले कलेज यौनिक तथा लैंगिक अल्पसंख्यकहरूप्रति पनि अनुदार रहेको आरोप लगाइन्।
उनका अनुसार, उनले गत डिसेम्बर २५, २०२४ मा कलेज प्रशासन समक्ष लिखित उजुरी दिएकी थिइन्। तर, प्रशासनले त्यसलाई बेवास्ता गरेपछि अन्ततः उनले सामाजिक सञ्जालमा आफ्नो अनुभव सार्वजनिक गरेको दाबी गरेेकि थिन ।
यो आरोप सार्वजनिक भएपछि, केएसएलका १०३ जना पूर्वविद्यार्थीले नाम खुलाएर र ४७ जनाले परिचय गोप्य राख्ने शर्तमा हस्ताक्षर गर्दै छात्राले उठाएका विषयमा ऐक्यबद्धता जनाएको उनीहरूले जारी गरेको विज्ञप्तिमा भनिएको छ, “अपमानजनक, हेपाइजन्य र यौनजन्य टिप्पणीहरू कुनै पनि संस्थामा स्वीकार्य हुन सक्दैनन्।”
छानबिन समिति गठन
विद्यार्थी र पूर्वविद्यार्थीहरूबाट विरोध चर्किएपछि केएसएल व्यवस्थापन समितिको बैठकले स्वतन्त्र छानबिन समिति गठन गर्ने निर्णय गरेको जानकारी दिएको छ । उक्त जानकारी अनुसरा संयोजक पूर्व जिल्ला न्यायाधीश डा. श्रीकृष्ण भट्टराई सदस्यहरू वरिष्ठ पत्रकार तीर्थ कोइराला अधिवक्ता सिमा धामी रहेका छन् ।
समितिलाई १५ दिनभित्र प्रतिवेदन बुझाउने जिम्मेवारी दिइएको छ । समितिको कार्यालय केएसएलमै रहनेछ भने कलेजको आन्तरिक उजुरी तथा गुनासो समितिका संयोजक सदस्य सचिव हुनेछन्।
डा. संग्रौलाको प्रतिक्रिया
पत्रकार सम्मेलनमा बोल्दै डा. संग्रौलाले स्वतन्त्र छानबिनलाई पूर्ण रूपमा सहयोग गर्ने प्रतिबद्धता जनाएका छन् । “छानबिन समितिले काम गरुञ्जेल म न्यूट्रल बस्छु, मेरो कुनै हस्तक्षेप हुँदैन,” उनले भनेका छन् ।
उनले आरोपहरूलाई सामाजिक सञ्जालमा राख्नुको सट्टा कानुनी निकायमा उजुरी दिनुपर्ने उनको धाराणा थसयो “यदि म दोषी ठहरिए भने, राज्यका निकायहरूले अनुसन्धान गरेर मलाई पक्राउ गर्न सक्छन्,” उनले थपे।
केएसएल प्रशासनको धारणा
केएसएलले जारी गरेको विज्ञप्तिमा, छात्राले आरोप लगाएको विषयमा छानबिन गर्न समिति गठन भइसकेको र निष्पक्ष छानबिन गरिने उल्लेख छ। विज्ञप्तिमा कलेजले अघिल्लो वर्ष एलजिबिटिक्यू मानव अधिकारसम्बन्धी अभ्यास अदालत (मुट कोर्ट) प्रतियोगिता आयोजना गरेको उल्लेख गर्दै छात्राले लगाएका आरोपहरू निराधार रहेको दाबी गरिएको छ।
अब के हुन्छ?
छानबिन समितिले १५ दिनभित्र प्रतिवेदन बुझाउने छ। त्यसपछि केएसएल व्यवस्थापन समितिले थप निर्णय लिने छ। यदि आरोप पुष्टि भए, कलेजले उचित कारबाही गर्ने बताइएको छ। डा. संग्रौलामाथिको आरोप गम्भीर छ, जसको छानबिन गर्न स्वतन्त्र समिति गठन गरिएको छ। अब समितिको निष्कर्ष आएपछि मात्र सत्यतथ्य बाहिर आउने जानकारी दिएको छ।
