भक्तपुर । भक्तपुरको पारिजात विद्याकुञ्जले विद्यालयको गुणस्तरीय शिक्षामा योगदान पुर्याउने विद्यार्थी, शिक्षक र अभिभावकलाई एकसाथ सम्मान गरेको छ। चाँगुनारायण नगरपालिका–८, सुडालको रातोपाटीस्थित विद्यालयले अभिभावक अभिमुखिकरण, विद्यार्थी सम्मान तथा सांस्कृतिक कार्यक्रमसहित विशेष समारोह आयोजना गरेको थियो।
विद्यालयका प्रिन्सिपल विक्रम थापाका अनुसार विद्यालयको समग्र विकासका लागि विद्यार्थी, शिक्षक र अभिभावकबीचको समन्वय आवश्यक भएकाले सम्मान कार्यक्रमको आयोजना गरिएको हो।
कार्यक्रममा शैक्षिक सत्र २०८१ मा विभिन्न अतिरिक्त क्रियाकलापमा उत्कृष्ट प्रदर्शन गर्ने २३ विद्यार्थीलाई अभिभावकको उपस्थितिमा सम्मान गरियो। विद्यार्थीहरू सम्मानित हुँदा हर्षित देखिन्थे भने अभिभावकहरू आफ्ना सन्तानको सफलताको साक्षी बन्न पाउँदा उत्साहित भएका थिए। सम्मानित विद्यार्थीहरूमा एसईई २०८० का परीक्षार्थी, कक्षा १ देखि १० सम्मका उत्कृष्ट नतिजा प्राप्त गर्ने, खेल सप्ताहका विजेता तथा बाह्य अतिरिक्त क्रियाकलापमा सहभागी विद्यार्थीहरू रहेका थिए।
यस्तै, विद्यालयमा कार्यरत २१ शिक्षक र ४ कर्मचारीलाई पनि विशेष सम्मान प्रदान गरियो। उनीहरूलाई विद्यालयका प्रिन्सिपल थापा, नेसनल प्याब्सन भक्तपुरका अध्यक्ष संजय खड्का, जागृति स्कुलका प्रिन्सिपल जगदिश पौडेल, आराधना स्कुलका साधुराम गैंडा तथा पूर्व विद्यालय व्यवस्थापन समिति अध्यक्ष महेन्द्रबहादुर खत्रीले सम्मान गरे।
कार्यक्रममा अभिभावक अभिमुखिकरणसमेत आयोजना गरिएको थियो। उत्प्रेरक विकासदेव योञ्जनले सहजीकरण गर्दै विद्यार्थीको भविष्य निर्माणमा अभिभावकको भूमिका महत्त्वपूर्ण हुने बताउँदै उनीहरू नै आफ्ना सन्तानका लागि आदर्श बन्नुपर्नेमा जोड दिए।
सोही अवसरमा नेसनल प्याब्सन भक्तपुरका अध्यक्ष खड्काले पारिजात विद्याकुञ्जले शैक्षिक क्षेत्रमा उल्लेखनीय योगदान पुर्याएको उल्लेख गर्दै अभिभावकहरूलाई आफ्नै क्षेत्रका विद्यालय रोज्न प्रेरित गरे।
सांस्कृतिक कार्यक्रममा विद्यार्थीहरूले विभिन्न गीत, संगीत, नृत्य तथा गायन प्रस्तुत गर्दै आफ्नो प्रतिभा प्रदर्शन गरेका थिए।
