भक्तपुर – नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ ले नेपाली राजनीतिको तीन धारमध्ये अग्रगामी धारको नेतृत्व माओवादीले गरिरहेको बताएका छन्। शनिबार भक्तपुरमा आयोजित प्रशिक्षण कार्यक्रममा उनले नेपाली काँग्रेस र नेकपा (एमाले) मौका पाउनेबित्तिकै प्रतिगामी धारमा मिसिन सक्ने चेतावनी दिए।
उनले राजसंस्थाको अन्त्य माओवादीकै कारण सम्भव भएको भन्दै, माओवादी कमजोर भए राजसंस्था पुनः फर्कने खतरा रहेको बताए। साथै, समाजवादी धारमा रहेका सच्चा नेता-कार्यकर्तालाई साथमा ल्याउनुपर्नेमा उनले जोड दिए।
राजावादीहरूको आन्दोलनलाई अवसरका रूपमा लिनुपर्ने उल्लेख गर्दै प्रचण्डले गणतन्त्रलाई संस्थागत गर्दै समाजवादको दिशामा अघि बढ्नुपर्ने बताए। उनले चैत १५ मा हुने जनप्रदर्शन पूर्व निर्धारित कार्यक्रम भएको स्पष्ट पार्दै, प्रतिगामी शक्ति र वर्तमान सरकारको भ्रष्ट गतिविधिविरुद्ध जनशक्ति परिचालन गरिने बताए।
भक्तपुरको राजनीतिबारे टिप्पणी गर्दै उनले नेमकिपाका अध्यक्ष नारायणमान बिजुक्छे ‘रोहित’ को “प्वाँख पलाएको” टिप्पणी गरे। माओवादीप्रति जनताको आकर्षण बढेको भन्दै उनले कार्यकर्तालाई गाउँ-गाउँमा संगठन बलियो बनाउन निर्देशन दिए।
कार्यक्रममा पार्टी सचिव हितमान शाक्य, केन्द्रीय सदस्यहरू लगायत स्थानीय नेताहरूको उपस्थिति रहेको थियो।
