काठमाडौँ, २ चैत — समाजवादी मोर्चा, नेपालले देशमा विकसित नयाँ राजनीतिक परिस्थितिलाई ध्यानमा राख्दै प्रतिगामी तत्वहरूको गतिविधिविरुद्ध सशक्त प्रतिरोध गर्न काठमाडौंमा विशाल विरोध प्रदर्शन गर्ने घोषणा गरेको छ।
आज आयोजित पत्रकार सम्मेलनमा समाजवादी मोर्चाले देशमा सङ्घीय लोकतान्त्रिक गणतन्त्रको रक्षा, राष्ट्रिय स्वाधीनता र समाजवादको यात्रालाई अगाडि बढाउने विषयमा गम्भीर छलफल भएको जनाएको छ। मोर्चाले नेपाली श्रमजीवी जनताको विभिन्न ऐतिहासिक संघर्षहरू स्मरण गर्दै, गणतन्त्रविरोधी षड्यन्त्रहरूलाई परास्त गर्न सबै न्यायप्रेमी जनसमुदायलाई एकताबद्ध हुन अपील गरेको छ।
समाजवादी मोर्चाका नेताहरूले हालैका दिनहरूमा सरकारको अलोकतान्त्रिक रवैया, भ्रष्टाचार, जनजीविकामा आएको सङ्कट, र राजतन्त्र पुनःस्थापनाका लागि भइरहेका प्रतिगामी गतिविधिहरू प्रति गम्भीर चिन्ता व्यक्त गरे। उनीहरूका अनुसार, वर्तमान राज्यसत्ताका नेतृत्वकर्ताहरूको अदूरदर्शिता र स्वेच्छाचारिताका कारण देश अप्ठ्यारो परिस्थितिबाट गुज्रिरहेको छ।
यसै सन्दर्भमा, समाजवादी मोर्चाले आगामी चैत १५ गते (शुक्रबार) काठमाडौँमा विशाल विरोध प्रदर्शनसहितको जनसभा आयोजना गर्ने घोषणा गरेको छ। मोर्चाले संसदभित्र र बाहिरका गणतन्त्रवादी राजनीतिक दलहरू, नागरिक समाज, बुद्धिजीवी र सबै देशभक्त शक्तिहरूलाई एकताबद्ध भई प्रतिगमनविरुद्ध आवाज उठाउन आह्वान गरेको छ।
पत्रकार सम्मेलनमा समाजवादी मोर्चाका नेताहरू क. प्रचण्ड, क. माधवकुमार नेपाल, क. विप्लव सी, र क. महेन्द्र राय यादव को संयुक्त उपस्थिती रहेको थियो।
