फाल्गुन ३०, २०८१ नगरकोट: नगरकोट भ्रमण वर्ष २०८२ लाई लक्षित गरी काठमाडौँबाट नगरकोटसम्म सिधा बस सेवा सञ्चालनमा आएको छ। उत्तरपूर्वी यातायात प्रा. लि. र ख्वप मिनीबस यातायात प्रा. लि. को संयुक्त सहकार्यमा उक्त बस सेवा सञ्चालनमा ल्याइएको हो।
शुक्रबार आयोजित एक कार्यक्रममा चाँगुनारायण नगरपालिकाका नगर प्रमुख जीवन खत्रीले रिबन काटेर बस सेवाको औपचारिक शुभारम्भ गर्नुभयो।
सो अवसरमा मेयर खत्रीले काठमाडौँबाट नजिकैको महत्वपूर्ण पर्यटकीय गन्तव्य भए पनि नगरकोटसम्म सिधा बस सेवा नहुनु दुर्भाग्यपूर्ण भएको बताउँदै भ्रमण वर्षलाई लक्षित गर्दै सेवा शुभारम्भ गर्न पाउँदा खुशी व्यक्त गर्नुभयो।
उहाँले बस सेवा सञ्चालनसँगै नगरकोटमा पर्यटकको आकर्षण अझै बढ्ने विश्वास व्यक्त गर्दै, प्राकृतिक, धार्मिक, सांस्कृतिक महत्त्व बोकेको नगरकोटको मनमोहक दृश्यावलोकन सहज हुने बताउनुभयो। साथै, आगमी वैशाख १ गतेदेखि सुरु हुने नगरकोट भ्रमण वर्ष २०८२ लाई सफल बनाउन यो बस सेवाले महत्वपूर्ण भूमिका खेल्ने विश्वास व्यक्त गर्नुभयो।
कार्यक्रममा चाँगुनारायण नगरपालिका वडा नं. ६ का वडाध्यक्ष धनबहादुर लामा, ख्वप बस व्यवसायी समितिका अध्यक्ष ज्ञानेन्द्र महर्जन, उत्तरपूर्वी बस व्यवसायी समितिका अध्यक्ष निरोज नगरकोटी, व्यवसायी, काठमाडौँ महानगरपालिकाका प्रतिनिधि तथा ट्राफिक प्रहरीको सहभागिता रहेको थियो।
