काठमाडौं, – विपक्षी चार दल सम्मिलित समाजवादी मोर्चाले राजधानी काठमाडौंमा चैत १५ गते वृहत् जनसभा गर्ने निर्णय गरेको छ।
आज बसेको मोर्चाको बैठकले जनसभालाई ऐतिहासिक र प्रभावशाली बनाउन व्यापक तयारी गर्ने निष्कर्ष निकालेको नेता खड्गबहादुर विश्वकर्मा (प्रकाण्ड) ले जानकारी दिए।
उनले भने, “चैत १५ गतेको प्रदर्शनलाई अत्यन्तै भव्य र प्रभावशाली बनाइनेछ। हजारौँ जनताको सहभागिता सुनिश्चित गर्दै हाल देखिएका प्रतिगामी कदमहरूलाई निष्क्रिय पार्ने उद्देश्यका साथ कार्यक्रम आयोजना गरिनेछ।”
मोर्चाले संसदवादी दलहरू तथा बाहिर रहेका अन्य दलहरूसँग समन्वय गर्दै गणतन्त्रको रक्षा र समाजवादतर्फको यात्रा सहज बनाउने विषयमा छलफल गर्ने निर्णय पनि गरेको छ।
बुद्धिजीवी तथा नागरिक समाजसँग छलफल
वृहत् प्रदर्शनअघि, समाजवादी मोर्चाले भोलि (चैत २ गते) बिहान ११ बजेबाट बुद्धिजीवी तथा नागरिक समाजसँग अन्तरक्रिया तथा परामर्श कार्यक्रम गर्ने निर्णय गरेको छ। कार्यक्रम बिहान ११:०० बजे बुद्धिजीवी तथा नागरिक समाजसँग अन्तरक्रिया हिमालयन होटेल, कुपण्डोल गर्ने निर्णय गरेको छ । त्यसै गरि दिउँसो २:३० बजे पत्रकार सम्मेलनको आयोजना गरी जनसभाको तयारी र उद्देश्यबारे विस्तृत जानकारी प्रदान गरिनेछ
मोर्चाले परिस्थितिलाई गम्भीर रूपमा लिँदै आगामी आन्दोलनका कार्यक्रमलाई प्रभावकारी बनाउन थप रणनीति तयार पार्ने बताएको छ।
