भक्तपुर, कालीघाट— नेपाल मजदुर किसान पार्टी (नेमकिपा) का अध्यक्ष नारायणमान बिजुक्छेँले कुनै पनि हालतमा नेपालमा राजतन्त्र फर्कने सम्भावना नरहेको बताएका छन्। भक्तपुरको व्यासीस्थित वासु माध्यमिक विद्यालयको ६३औँ वार्षिकोत्सव तथा पुरस्कार वितरण समारोहलाई सम्बोधन गर्दै उनले प्रजातन्त्र प्राप्तिपछि राजनीतिक दलहरूले जनअपेक्षाअनुसार काम गर्न नसक्दा निराशा छाए पनि राजतन्त्रको पुनःस्थापना सम्भव नभएको स्पष्ट पारे।
अध्यक्ष बिजुक्छेँले भने, “सानो छँदाको कपडा ठूलो भएपछि काम लाग्दैन, त्यसैगरी गइसकेको राजतन्त्र फर्कँदैन र फर्किन दिनु पनि हुन्न।” उनले प्रजातन्त्र पुनःस्थापनापछि बनेका सरकारले जनताको अपेक्षाअनुसार काम गर्न नसकेको स्विकार्दै पनि राजसंस्थाको विकल्प खोज्नुपर्ने बताए।
उनका अनुसार राजतन्त्र वर्गीय रूपमा सामन्त वर्गको हितमा मात्र केन्द्रित रहेको छ, गरिब तथा श्रमिक वर्गको पक्षमा होइन। राजनीतिक दलका नेताहरू आफ्ना कमजोरीका कारण जनता राजसंस्थाको पक्षमा फर्कने त्रासमा रहे पनि वास्तविक समाधान सुशासन र जनउत्तरदायी शासन प्रणाली नै भएको उनले उल्लेख गरे।
