काठमाडौं । यस वर्षको माध्यमिक शिक्षा परीक्षा (एसईई) आगामी चैत ७ गतेदेखि देशभर सञ्चालन हुँदैछ। परीक्षा नियन्त्रण कार्यालय, सानोठिमीका अनुसार, यस परीक्षामा ५ लाख २२ हजार विद्यार्थी सहभागी हुने भएका छन्।

नियमिततर्फ ४ लाख ६८ हजार विद्यार्थीले परीक्षा दिनेछन् भने ग्रेड वृद्धि (पुरक) परीक्षाका लागि ५० हजार विद्यार्थीले फारम भरेका छन्। साथै, पुराना ग्रेड वृद्धि गर्ने विद्यार्थीको संख्या ४ हजार रहेको छ।

राष्ट्रिय परीक्षा बोर्डले परीक्षालाई व्यवस्थित, मर्यादित र निष्पक्ष बनाउन आवश्यक तयारी पूरा गरेको जनाएको छ। परीक्षाका लागि केन्द्रहरू तोकिसकिएको छ भने विद्यार्थीहरूलाई निर्धारण गरिएको तालिका अनुसार तयारी गर्न आग्रह गरिएको छ।

एसईई परीक्षालाई शिक्षाको महत्वपूर्ण चरण मानिन्छ, जसले विद्यार्थीहरूको शैक्षिक यात्रामा नयाँ अवसरहरू सिर्जना गर्नेछ।