फागुन १९, २०८१, काठमाडौँ – जिल्ला सहकारी संघ लिमिटेडको आ.व. २०८१/८२ को अर्धवार्षिक समीक्षा बैठक सोमबार शुभकामना सकोसको सभाहलमा भव्य रूपमा सम्पन्न भएको छ। संघका अध्यक्ष श्री ध्रुब बहादुर रायमाझीको अध्यक्षतामा सम्पन्न उक्त कार्यक्रममा संस्थाको हालसम्मको प्रगति मूल्यांकन गर्दै भावी रणनीतिहरूको टुंगो लगाइएको थियो।
कार्यक्रमको उद्घाटन संघका पूर्व अध्यक्ष तथा सल्लाहकार श्री महेश श्रेष्ठले गर्नुभएको थियो। उहाँले सहकारी क्षेत्रको सशक्तीकरणका लागि सबै पक्षले अझ जिम्मेवारीपूर्वक भूमिका खेल्नुपर्नेमा जोड दिनुभयो। उपाध्यक्ष श्री बिरेन्द्रभक्त प्रधानाङ्गले संघको वित्तीय अवस्था प्रस्तुत गर्दै पौष मसान्तसम्मको प्रतिवेदन सार्वजनिक गर्नुभयो।
संघका सचिव श्री राम प्रसाद कासुलाले कार्यक्रम सञ्चालन गर्नुभएको थियो भने स्वागत मन्तव्य उपाध्यक्ष श्री सहाना पसखलले व्यक्त गर्नुभएको थियो।
बैठकमा संघका सञ्चालक समिति, लेखा सुपरिवेक्षण समिति, सल्लाहकार समिति तथा विभिन्न उप-समितिका पदाधिकारीहरू, कर्मचारीहरू एवं आमन्त्रित शेयर सदस्यहरूको उल्लेखनीय उपस्थिति रहेको थियो।
संस्थाका विविध गतिविधिहरूको समीक्षा गर्दै पूर्व अध्यक्ष तथा सल्लाहकार श्री महेश श्रेष्ठ र निवर्तमान अध्यक्ष श्री केदार खड्काले महत्वपूर्ण धारणा राख्नुभयो। साथै, सहभागी सदस्यहरू दामोदर न्यौपाने, श्रीकृष्ण बिष्ट, दिपक न्यौपाने र कृष्णबहादुर घजुले संस्थाको कार्यसम्पादन तथा भावी योजनासम्बन्धी महत्वपूर्ण सुझावहरू राख्नुभयो।
बैठकका क्रममा सहकारी क्षेत्रलाई अझ व्यवस्थित, पारदर्शी र सशक्त बनाउने विषयमा गहन छलफल भएको थियो। उपस्थित सदस्यहरूको जिज्ञासाको समाधान गर्दै अध्यक्ष श्री ध्रुब बहादुर रायमाझीले आगामी दिनमा संघको भूमिका अझ प्रभावकारी बनाइने प्रतिबद्धता जनाउँदै धन्यवाद ज्ञापनसहित कार्यक्रमको समापन गर्नुभयो।
