भक्तपुर, २०८२ असोज २७ ।
नेपाल सरकार गृह मन्त्रालय अन्तर्गतको जिल्ला प्रशासन कार्यालय भक्तपुरले तिहार र छठ पर्वलाई लक्षित गर्दै विशेष सावधानी र सुरक्षा सम्बन्धी सूचना जारी गरेको छ।
सूचनामा नेपालीहरूको महान् चाड शुभ–दीपावली र नेपाल संवत् ११४५ तथा छठ पर्वको पावन अवसरमा सम्पूर्ण नागरिक, संस्था, सुरक्षाकर्मी र सरोकारवालाहरूप्रति शुभकामना व्यक्त गरिएको छ। साथै, चाडपर्वमा सामाजिक सौहार्द, शान्ति र सुरक्षा कायम राख्न सबैलाई सचेत रहन आग्रह गरिएको छ।
प्रमुख जिल्ला अधिकारी नमराज घिमिरेले हस्ताक्षर गरेको सूचनामा निम्न बुँदाहरू उल्लेख छन्:
- दीपावलीको अवसरमा मैनबत्ती वा विजुलीको प्रयोग गर्दा सावधानी अपनाउन, आतिसबाजी, पटाका, धुवाँ उत्पन्न गर्ने वा आगलागीको जोखिम हुने कार्य नगर्न आग्रह।
- देउसी–भैलो खेल्दा सभ्य र मर्यादित तरिकाले खेल्न र राति १० बजेपछि यस्तो गतिविधि रोक्न अनुरोध।
- देउसी–भैलो खेल्ने नाममा कसैलाई जबरजस्ती नगर्न र नगद माग्ने कार्य नगर्न आग्रह।
- भीडभाड हुने ठाउँमा सवारी साधन व्यवस्थापन र पार्किङमा ध्यान दिन अनुरोध।
- घर छाडेर बाहिर जानेले आफ्नो घर–छिमेक सुरक्षित राख्न र प्रहरीलाई जानकारी दिनु पर्ने उल्लेख।
- सवारी साधन चलाउँदा मादक पदार्थ सेवन नगर्न र ट्राफिक नियम पालन गर्न निर्देशन।
- अवैध कारोबार, कालोबजारी, मूल्यवृद्धि र नक्कली सामान बिक्रीजस्ता कार्य नगर्न चेतावनी।
- कानूनविपरीत हतियार, विस्फोटक पदार्थ वा अशान्ति फैलाउने कार्य गरे कारबाही गरिने चेतावनी।
कार्यालयले सबैलाई सावधानीपूर्वक र मर्यादित तरिकाले चाडपर्व मनाउन आग्रह गर्दै कुनै शंकास्पद गतिविधि देखिएमा सुरक्षा निकाय वा प्रहरी कन्ट्रोल १०० मा जानकारी दिन अनुरोध गरेको छ।
सूचनाको अन्त्यमा प्रमुख जिल्ला अधिकारी घिमिरेले भनेका छन् —
“शान्ति, सुरक्षा र सद्भाव सबैभन्दा ठूलो पर्व हो। हाम्रा चाडपर्वहरू एकता र सहअस्तित्वका प्रतीक हुन्, त्यसैले सबै नागरिकले जिम्मेवार र अनुशासित ढङ्गले चाड मनाउन आग्रह गर्दछौं।”
यससँगै भक्तपुर प्रशासनले तिहार र छठ पर्वको तयारीमा जिल्लाभर सुरक्षा व्यवस्था कडा पारिएको जानकारी पनि दिएको छ।
