भक्तपुर, जेठ २२।
विश्व वातावरण दिवसको अवसरमा भक्तपुरमा विविध कार्यक्रम गरी वातावरणप्रति जनचेतना अभिवृद्धि गरिएको छ। ‘राष्ट्रका लागि दुई घण्टा’ अभियानअन्तर्गत बिहीबार बिहान वाकाथन (पैदल यात्रा) तथा वृक्षारोपण कार्यक्रम आयोजना गरिएको हो।
सूर्यविनायक नगरपालिकाको सहकार्यमा सम्पन्न कार्यक्रममा वातावरण संरक्षणको महत्त्वबारे चर्चा गर्दै नगरप्रमुख वासुदेव थापाले प्लास्टिक प्रदूषण न्यूनीकरणलाई प्राथमिकता दिइएको बताउनुभयो। उहाँले नगरपालिकालाई छिट्टै प्लास्टिकमुक्त क्षेत्र घोषणा गर्ने तयारी भइरहेको जानकारी दिँदै, यसको दीर्घकालीन समाधानका लागि वैकल्पिक उपायहरू समेत कार्यान्वयनमा ल्याइने प्रतिबद्धता जनाउनुभयो।
“प्लास्टिकले हाम्रो जीवनलाई सहज बनाएको सत्य हो,” नगरप्रमुख थापाले भन्नुभयो, “तर यसले वातावरणमा पारेको दीर्घकालीन असर गम्भीर छ। त्यसैले अब हामी जिम्मेवार नागरिकका रूपमा परिवर्तनको थालनी गर्नुपर्छ।”
कार्यक्रममा सहभागी स्थानीयवासी, विद्यार्थी तथा अभियानकर्मीहरूले वाकाथनमा सहभागिता जनाउँदै वातावरण संरक्षणप्रतिको ऐक्यबद्धता प्रकट गरे। वृक्षारोपण कार्यक्रममार्फत वातावरणीय सन्तुलन कायम राख्न सबैलाई आ–आफ्नो स्थानबाट योगदान पुर्याउन आह्वान गरिएको थियो।
यस वर्षको विश्व वातावरण दिवस ‘प्लास्टिक प्रदूषण न्यूनीकरण : हाम्रो दायित्व’ भन्ने नारासहित मनाइँदैछ। वातावरणविद्हरूका अनुसार यस्ता सन्देशमूलक क्रियाकलापहरूले दीर्घकालीन सचेतना विस्तारमा सहयोग पुग्ने अपेक्षा गरिएको छ।
