विराटनगर । राष्ट्रिय सभा निर्वाचनको मौन अवधिको समयमा दुई गठबन्धनले छुट्टा छुट्टै भेला गरेका छन् । नेकपा एमाले र राप्रपाले होटलमा र सत्ताबन्धनले डाक्टर शेखर कोइरालाको निवासमा भेला गरेका हुन् ।
कोइराला निवासमा चियापानका लागि भन्दै गठबन्धनका मतदातालाई भेला गरिएको थियो । नेकपा एमाले र राप्रपाले भने मोती दुगडको होटल ह्यारिसनमा भेला राखेको हुन् ।
कांग्रेस केन्द्रीय सदस्यसमेत रहेका नेता कोइरालाले राष्ट्रिय सभाका उम्मेदवार कृष्णप्रसाद सिटौलासहित निर्वाचनका मतदाता प्रदेश सभाका सदस्य र स्थानीय तहका जनप्रतिनिधि बोलाएका थिए ।
कोइराला निवासमा कांग्रेस महामन्त्री गगन थापा, नेता मिनेन्द्र रिजाल, रामहरी खतिवडा, मीनबहादुर विश्वकर्मालगायत केन्द्रिय नेता सहभागी थिए । गठबन्धन दलका केही नेता पनि पुगेका थिए ।
कोइरालाले निर्वाचनमा कांग्रेस एक भएको सन्देश दिन भेला राखेका हुन् । नेकपा एमाले र राप्रपाले एमाले महासचिव शंकर पोखरेलको उपस्थितिमा ह्यारिसनमा भेला राखेका हुन् ।
