भक्तपुर, २० चैत्र २०८१ – भक्तपुर उद्योग वाणिज्य संघ र शिखर इन्स्योरेन्स कम्पनी लिमिटेडको संयुक्त आयोजनामा भक्तपुर जिल्लाका उद्योगी तथा व्यवसायीहरूलाई निर्जीवन बीमासम्बन्धी जानकारी दिने उद्देश्यले अभिमुखीकरण कार्यक्रम सम्पन्न भएको छ। बुधबार सूर्यविनायक नगरपालिकास्थित होटल घ्याम्पेडाँडामा आयोजित उक्त कार्यक्रममा बीमासम्बन्धी सचेतना अभिवृद्धि गर्ने प्रयास गरिएको थियो।
कार्यक्रममा भक्तपुर उद्योग वाणिज्य संघकी अध्यक्ष रोशनीमैयाँ धौबन्जाले उद्योग तथा व्यवसायमा हुने आर्थिक जोखिम न्यूनीकरणका लागि बीमा अत्यावश्यक रहेको बताइन्। उनले प्राकृतिक प्रकोप वा अन्य कुनै आकस्मिक घटनाबाट हुनसक्ने क्षतिबाट बच्न बीमाको आवश्यकतामा जोड दिइन्।
शिखर इन्स्योरेन्स कम्पनी लिमिटेडका प्रमुख कार्यकारी अधिकृत दीपप्रकाश पाण्डेले बीमालाई औपचारिकता मात्र नभई आवश्यकता बनाउनुपर्ने धारणा व्यक्त गरे। उनले बीमा दुःख पर्दाको साथी भएको भन्दै, प्रक्रियागत तरिकाबाट अघि बढेमा बीमा दाबी भुक्तानी पाउन कुनै झन्झट नहुने विश्वास दिलाए।
सोही अवसरमा शिखर इन्स्योरेन्सका महाप्रबन्धक उदितप्रसाद काफ्लेले निर्जीवन बीमासम्बन्धी विस्तृत प्रस्तुतीकरण दिएका थिए। उनले बीमा गर्दा पालना गर्नुपर्ने प्रक्रिया, बीमाका विभिन्न प्रकार, सम्पत्ति बीमा, विदेश यात्रा मेडिकल बीमा, सवारी साधन बीमा लगायतका विषयमा जानकारी गराएका थिए।
त्यसैगरी, शिखर इन्स्योरेन्सका नायव महाप्रबन्धक सुरज राजवाहकले कम्पनीको इतिहास, प्रदान गरिएका सेवाहरू तथा हालसम्म कम्पनीले बीमा बापत भुक्तानी गरेको रकमबारे जानकारी गराए। कार्यक्रममा भक्तपुर उद्योग वाणिज्य संघका वरिष्ठ उपाध्यक्ष कृष्णमुरारी न्यौपाने र महासचिव नविन प्रजापतिले बीमाको महत्वबारे आफ्ना विचार व्यक्त गरे। कार्यक्रममा १२० जना उद्योगी तथा व्यवसायीहरूको उपस्थिति रहेको थियो।
यसैबीच, भक्तपुर उद्योग वाणिज्य संघ र शिखर इन्स्योरेन्स कम्पनी लिमिटेडबीच बीमा सेवा सम्बन्धी सम्झौता समेत सम्पन्न भएको छ। सम्झौतामा भक्तपुर उद्योग वाणिज्य संघको तर्फबाट अध्यक्ष धौबन्जा र शिखर इन्स्योरेन्स कम्पनीको तर्फबाट प्रमुख कार्यकारी अधिकृत पाण्डेले हस्ताक्षर गरेका छन्। सम्झौताका साक्षीका रूपमा संघका वरिष्ठ उपाध्यक्ष न्यौपाने, महासचिव प्रजापति तथा शिखर इन्स्योरेन्स कम्पनीका नायव महाप्रबन्धक राजवाहक उपस्थित थिए।
