१४ चैत्र २०८१ भक्तपुर, मध्यपुर थिमि – लोकतन्त्रले प्रत्येक नागरिकलाई राजा बनाउने अधिकार प्रदान गरेको उल्लेख गर्दै सांसद थापाले मुलुकमा कुनै राजा वा रानी आवश्यक नरहेको स्पष्ट पारेका छन्।
बिहीबार भक्तपुरको मध्यपुर थिमि नगरपालिकाको २९औँ स्थापना दिवसको अवसरमा आयोजित कार्यक्रमलाई सम्बोधन गर्दै सांसद थापाले यो धारणा व्यक्त गरेका हुन्। उनले लोकतान्त्रिक प्रणालीले जनतालाई आफ्नो नेतृत्व चयन गर्ने अधिकार दिएको बताउँदै व्यवस्था परिवर्तनको आवश्यकता नरहेको उल्लेख गरे।
थापाले जनताले आफ्नो प्रतिनिधि चुन्ने, परिवर्तन गर्न पाउने अधिकारलाई लोकतन्त्रको सबैभन्दा ठूलो विशेषता भन्दै भने, “नेपालमा न कुनै आन्दोलनको आवश्यकता छ, न त व्यवस्था परिवर्तनको। न कुनै राजाको आवश्यकता छ, न त कुनै रानीको। लोकतन्त्रले तपाईंहरू सबैलाई राजा बनाएको छ। त्यसकारण तपाईंहरू नै मुलुकका राजा हुनुहुन्छ।”
उनले सरकारको नेतृत्वमा रहेका व्यक्तिहरूले जनअपेक्षाअनुसार काम गर्नुपर्नेमा जोड दिँदै, यदि प्रधानमन्त्री वा अन्य जनप्रतिनिधिहरूले जनताको चाहनाअनुसार काम नगरेमा जनताले अस्वीकार गर्ने बताए। सांसद थापाले केही राजनीतिक दलहरू ‘मिसन ०८४’ भन्दै अगाडि बढिरहेको उल्लेख गर्दै भने, “काम गर्न कुनै निश्चित वर्ष कुर्नुपर्ने आवश्यकता छैन। जसले जहाँबाट जसरी सकिन्छ, जनहितमा काम गर्नुपर्छ।”
देशले अब थप आन्दोलन र अराजकता थेग्न नसक्ने भन्दै उनले संविधानले नचिनेको राजतन्त्र फर्काउने प्रयासप्रति सचेत रहन नागरिकलाई आग्रह गरे। “संविधानले नचिनेको राजसंस्था ल्याउन लहलहैमा नलाग्नुहोस्,” उनले भने।कार्यक्रममा स्थानीय जनप्रतिनिधिहरू, बुद्धिजीवी, नागरिक समाजका अगुवा तथा स्थानीयबासीहरूको उपस्थिति रहेको थियो।
