काठमाडौं। भक्तपुरको सल्लाघारीस्थित तीनकुने खुला चौरमा नवौँ भक्तपुर औद्योगिक, सांस्कृतिक पर्यटन, कृषि तथा व्यापार महोत्सव २०८१/२०८२ भव्य रूपमा आयोजना हुने भएको छ। बिहीबार आयोजित पत्रकार सम्मेलनमा महोत्सव आयोजक समितिले चैत्र २८ गतेदेखि वैशाख ७ गतेसम्म सञ्चालन हुने जानकारी गराएको हो।

उद्योग, व्यापार, कृषि, पर्यटन र संस्कृति प्रवर्द्धन गर्ने उद्देश्यसहित आयोजना गरिने महोत्सवमा १ सय ५० वटा स्टल रहनेछ। महोत्सवमा दैनिक उपभोग्य वस्तुहरू, खाद्यान्न, भाँडाकुँडासँगै विभिन्न प्रकारका लत्ताकपडा, जुत्ता तथा हस्तकलाका सामग्रीहरू प्रदर्शन तथा बिक्री गरिने छ। साथै, औद्योगिक उत्पादन, अटोमोबाइल, आधुनिक कृषि औजारहरू समेत महोत्सवमा राखिने आयोजकले जानकारी दिएको छ।

उपभोक्ताहरूलाई लक्षित गर्दै मेलामा राखिएका सामग्रीहरूमा २० देखि ५० प्रतिशतसम्मको विशेष छुटको व्यवस्था गरिएको छ। साथै, करिब ५ लाखभन्दा बढीले महोत्सवको अवलोकन गर्ने अपेक्षा गरिएको छ।

महोत्सव अवलोकनका लागि प्रवेश शुल्क ५० रुपैयाँ तोकिएको छ भने विशेष सेवासहितको टिकटको मूल्य ८० रुपैयाँ रहेको छ। विद्यार्थी र ज्येष्ठ नागरिकहरूका लागि छुटको व्यवस्था गरिएको आयोजक समितिले जनाएको छ।

यो महोत्सव भक्तपुरको सांस्कृतिक तथा औद्योगिक पहिचानलाई प्रवर्द्धन गर्दै स्थानीय व्यवसायी तथा उपभोक्तालाई लाभ पुर्‍याउने अपेक्षा गरिएको छ।